منتديات القصيرين من حرب

منتديات القصيرين من حرب (http://www.alqesuirien.com/vb/)
-   منتدى الشعر الشعبي (http://www.alqesuirien.com/vb/f17/)
-   -   مساجله بين الشاعرين شلاح صالح الحربي وحمود سويلم الحربي (http://www.alqesuirien.com/vb/t4132.html)

شلاح صالح بن فازع 14-02-2013 02:02 AM

مساجله بين الشاعرين شلاح صالح الحربي وحمود سويلم الحربي
 
بسم الله الرحمن الرحيم


هذه القصيده موجه للشاعرالكبير/ حمود بن سويلم الرحيلي الحربي

يا بن سويلم غيم المزن وأنساق= مثل الثياب معلقــــــات البروقي
هلت بردها بين رخه وصفــــاق= قثوه على روس الحتايف دفوقي
وقعه حـقاق وماطر المزن دفاق= من وقعها جثت هميد العروقــــي
أحياضها جتني مدافيق وأشلاق= مدت وعادت وألحقتني لحوقـــي
حتى الورق ييبس غضاريف وأوراق=يصبح شجرها لون هدف أطبوقي
والرزق عند اللي تكفل بالأرزاق = وحزت طلوع الشمس يبدأ الشروقي
من روسنا جزل الطواريق تنساق= ماهي نبيته مفردات الطروقي
وطير السعد هز الجناحين خفاق = من ماكره نطلق طليق السبوقي
شعر النبط قطفه كما قطف زملاق= يا حمود قلبي للجزيله شفوقي
سوء التفاهم بين الأصحاب منعاق= ومنين ما ساقت هبوبه يتوقي
وراع الوفا لو مسه الحبل ما ضاق= الضيق من سرد الكلام الخلوقي
يامن سرد جملة كلامه بمشراق = والعلم جاني من شفاة الصدوقي
كثر الكلام وطايش الحكي ما لاق= يقطعك يمنى ما تفك الحلوقي
من غشني ماله معزه وميثاق = ولا علق الشره ردي العموقي
لا زلت الشيمه راع السحت زهاق= أضرب بسيفن للأصابه غموقي
مرت ولا هزت معاليق معلاق = آسم عراقيه على أرقاب نوقي
من هازنا يبطي عن الرجم ما واق= يا من تذوق من بحرنا الغبوقي
يا من طبخ فاسه يبي سوب وأمراق = اللي يبي من راس فاسه مروقي
ذيب العلوم اللي تقل خشم زراق = وألمس البارود خشم السلوقي
واللي سرق يصبح مع الناس سراق= والحق يقطع لي يمين السروقي
راع النمايم مجلسه تحت الأنفاق= عل الوجيه المكبيه للمحوقي
من لا يودك عل زوله للأفراق = اللي حصانه بالنميمه سبوقي

من أخوك / شلاح بن صالح القصيري الحربي


رد الشاعر الكبير/ حمود بن سويلم الرحيلي الحربي وفى وكفى أبو محمد


إعداد ما تكتب حروفن بالأوراق = وإعداد براقن سمر له إشعوقي
يا مرحبآ من خاطر للمثل تاق = والفكر له إصعاب المعاني تروقي
برسالتن جتني بها عدة أرناق = بيوتن معانيها بعضها يشوقي
لها على عدة مواضيع مزراق = احترت مدري بأي وجهه تلوقي
جملة معانيها بداء بينها أفراق= للي يحللها تبين الفروقي
جتني من اللي غلقت منه الأخلاق= شلاح بن صالح بجاشه حروقي
سبة كلامن جاه من بعض الأرفاق = يركضبه النمام في كل سوقي
بعض الكلام إن جاك قل بألف طقاق= لا تنخدع بهروج كل مخلوقي
اللي يجيب الهرج ويسبب إشقاق= عندالعوارف طيب اسماه لوقي
السمع صكه عن وسيعين الأشداق = اللي بهم من كل شينه بهوقي
لا يستثيرونك قليلين الأوفاق= وراء رديين البخت لا تتوقي
إن طعت شوري خلفهم تقصر الساق= شيمة عرب لمخيطين الفتوقي
عرض سوالفهم وسيعات الآفاق = من مثل ذولا خاطرك لا يضوقي
ما ضاع حق ولا تقفاك دراق = وأصلك عريب ولا تجيبه إدقوقي
وكنك على جزواء هل الهرج مشفاق= وتقول غاديلك وراهم حقوقي
قبل تصير لناقل الهرج لحاق = لا تطلق الغاره بلياء وثوقي
يمكن مصادير الخبر به تلفاق = إحذر تخف مع الهبوب الصفوقي
الناس مختلفين طيب وبواق = فارقهم اللي في عباده رفوقي
فيهم كريم للجزيلات سباق = وفيهم دوينين كذوب ودروقي
ما كل من شال التفق قيل تفاق = ولا كل رجال فيهم وحذوقي
ولا كل شاعر بالتماثيل عملاق = كم شاعرن يعطي وسيع الفلوقي
وإختامها باللي خلق سبع الأطباق = رب يسوق الدم وسط العروقي

الشاعر/ حمود بن سويلم الحربي

محمد سنيد 15-02-2013 01:29 PM

اخوي شلاح صالح القصيري صح لسانك وصح لسان الشاعر حمود الرحيلي
شعراء مبدعين بمعنى الكلمه استمتعنا بهذه المساجله والله يعطيكم العافيه
شكرا لكم وتقبلو
تحياتي....


أبوزياد العويمري 15-02-2013 02:12 PM

الشاعر العزيز شلاح صالح القصيري صح لسانك وصح لسان الشاعر حمود سويلم الرحيلي
والله يعطيكم العافيه

المسافر 15-02-2013 03:12 PM

صح لسان الشاعرين والله يعطيكم العافية
تحياتي واحترامي

فايزموسى البشري 15-02-2013 03:56 PM

صحت السنتكم مساجلة قيمه طرق ومعنا الله يعطيكم العافيه

سعد بن غالب 15-02-2013 09:45 PM

صح السان الشاعرين والله يعطيك العافيه على نقل هذه المساجله بينك وبين الشاعر حمود

سيف القصيري 15-02-2013 10:20 PM

صححت الالسنه. مساجله رائعه والله يعطيكم العافيه. ولكم اجمل التحياء

منصور القصيري 16-02-2013 12:42 PM

ابو صالح صح لسانك وصح لسان الشاعر حمود الرحيلي
والله يعطيكم العافية على هذه المساجله المميزة
تحياتي وتقديري للجميع

شلاح صالح بن فازع 16-02-2013 01:43 PM

الولهان ,أبو زياد العويمري , فايز موسى , المسافر , سعد بن غالب , سيف القصيري
منصور القصيري
أشكركم على المرور والردود الطيبة والله يعطيكم العافية
تقبلو تحيات / بن فــــــــــــــــــــــــــــــازع

صالح الحربي 16-02-2013 09:48 PM

صح لسانك يا شاعرنا / شلاح بن صالح القصيري ولسان الشاعر / حمود الرحيلي

قمه الروعه في المساجلة
الله يعطيكم العافية
ونريد منك المزيد يا شاعرنا والله يبيض وجهك .،.،.،.،.،.،.،.،.،.،.،



مع تحيات / صالح الحربي
*

صالح الحربي 16-02-2013 09:53 PM

صح لسانك يا شاعرنا القدير / شلاح بن صالح القصيري وصح لسان الشاعر / حمود بن سويلم الرحيلي
مساجلة رائعه وقصائد اروع
ويعطيكم العافية
ونريد منكم المزيد ،.،.،.،.،.،.،.،.،.،.،.
مع تحيات / صالح الحربي

فلاج المعلث 17-02-2013 11:26 AM

الشاعر شلاح القصيري 0 صح لسانك ولسان الشاعر حمود الرحيلي 0 لكم اجمل التحايا واعذبها

برق الحيا 17-02-2013 02:12 PM

الشاعر شلاح بن صالح صح لسانك ولسان الشاعر حمود بن سويلم
مساجله رائعة الله لايهينكم
دمتم ودام هذا التميز والابداع

شلاح صالح بن فازع 17-02-2013 10:56 PM

صالح الحربي ,فلاج المعلث ,برق الحيا
أشكركم على المرور والردود الطيبة
تقبلو تحيات / بن فـــــــــــــازع

نجم الجدي 19-02-2013 08:15 PM

صح لسان الشاعرين شلاح صالح القصيري و حمود سويلم القصيري على هذه المساجله وتقبل تحياتي

شلاح صالح بن فازع 20-02-2013 02:28 PM

أخوي نجم الجدي أشكرك على المرور والتعليق وللتصحيح
اسم الشاعر هو حمود بن سويلم الرحيلي وليس القصيري
تقبل تحيات / بن فـــــــــــــــــــــازع

ناصر ابن عويمر 21-02-2013 09:58 PM

صحة السنتكم
مساجله قيمه بين شاعرين كبيرين
تحياتي للجميع

شلاح صالح بن فازع 22-02-2013 02:07 PM

أخوي ناصر بن عويمر أشكرك على المرور والرد الطيب
مع تحيات / بن فـــــــــــــازع

شلاح صالح بن فازع 28-08-2014 03:45 PM

اشكر الجميع من علق على هذي المساجله بيني وبين الشاعر حمود سويلم الرحيلي
والشاعر الكبير حمود الرحيلي مدرسه شعريه ويتميز بالفتل والنقض الله يطول عمره من اجمل المساجلات واعذبها المساجله مع مثل هذا الشاعر الله يحفظه من كل شر ومكروه
اخوكم / شلاح بن فازع

سويلم بن سرور القصيري 28-08-2014 10:37 PM

صح السانك اخوي شلاح وصح السان الشاعر حمود سويلم الرحيلي مساجله جزله وماتجي الا من شعار جزلين


الساعة الآن 03:19 AM.

Powered by vBulletin® Version 3.8.7
Copyright ©2000 - 2019, vBulletin Solutions, Inc.
Search Engine Friendly URLs by vBSEO 3.6.0 PL2 Trans by
HêĽм √ 3.1 BY: ! ωαнαм ! © 2010

Security team