بعد الفجر شبيت ناري ثم زدت الها الحطب=وصلحت دله لاجل شايب مايغره ذوقها
وتكّا على مركاه قال اسمع كلام من ذهب=عندي وصايا واجده مبطي تلوح بروقها
قلت استهلي ياسحابه والوعد وقته قرب= تراي جاهل يايبه والناس من منطوقها
قال اسمع اسمع وانتبه مافيه عين بلا هدب=والغاليه يااحمد ترى ماضاق فيها سوقها
الاوله دينك تمسك به وخلك له محب=احذر تغرك هالفتن ويجيك من معشوقها
تالي زمانك وانت شايف ياولد كثر الجرب=حتى ولو شمس الحقيقه بازغه بشروقها
والثانيه بالمرجله اذهن تزل اعن العرب=اعرف حقوقك والرجال اذهن تكب حقوقها
قول وفعل واحساس ماهي بالتمني والطلب=المرجله بالرجل والله واضحات فروقها
والثالثه خاو الرجال اهل المعرفه والادب =اللي عن سلوم العرب مافيه شي يعوقها
ادمح لهم تسعين زله بس حذرا تنسحب=والا الردي لو طالت الخوه تراه يبوقها
والرابعه جارك عساك تجار من حر اللهب=احسن جواره واستر اسراره وسط صندوقها
والخامسه اليا نصاك الضيف حق له وجب=إنصاه في ترحيبةٍ مافيه شي يفوقها
والعود الازرق بعدها والشاذليه والشبب=وفي كل شيٍ يسعد رجال الكرم ويشوقها
خمس الوصايا لاتضيعها وانا اعطيك السبب=من فاتته يااحمد ترى يصعب عليه الحوقها

الشاعر / أحمد بن هايل القصيري

الموضوع الأصلي: خمس الوصايا || الكاتب: أحمد هايل || المصدر: منتديات القصيرين من حرب

المصدر: منتديات القصيرين من حرب