=بسم الله الرحمن الرحيم
في هذه الأيام بدخول الوسم أسأل الله أن يرزق البلاد والعباد بالخير والبركات ..........
يقول بن فـــــازع ترى الفكر ما راق =وشريط فكري عاد لي ما مضاله
هب النسيم وذعذع الريح وانساق =وهز المشاعر كلها مع خياله
قافن بلا معنى على الطرق ما لاق =ابن زويد قبلنا العلم قاله
أنا وغيري لجزل الشعر عشاق =والرجل ياخذ عزوته من رجاله
والطير لولا سلة الريش ينعاق =يصير لعبه للونس والجهاله
طلعه بعيد وخافق الريش ما فاق =والطير يدهل ماكره ويعناله
القيض ودع وانتهى يا بن رزاق =وسهيل بادي مع نهاية زواله
عز الطلب اللي على نجد مشتاق =والوسم داخل مع بداية هلاله
نجد العذيه وسعت صدر من ضاق= منها وفيها ما تحوفك ملاله
عل السحاب اللي سرا فيه براق =مطرق سحابه مع عتايم خياله
من بكري الوسمي توافيق ووفاق =الله كريم وكل مؤمن يساله
عله على مرتع هلا الفيح ينساق =والابل مكارم للرجال وشكاله
برقه يسوقه بالدجى تقل عملاق =هب الهبوب من الصبا وارتكاله
برقه يسوقه من سواحيق لساق =وعلى قطن دار الوفا والرجاله
ركبت مناكبها مداليج صفاق =من الخدار إليا فيافي غزاله
غرن مطرهن بصحاصيح دفاق =غرن هدبهن من روائح زلاله
ياما أرتوت منهن جراهيد ونفاق =طون شحاط الأرض طي المحاله
يسوقهن رب البرايا بالأعماق =وذعذع نسيمه مع نسايم شماله
رحمه ولا يذكر بها سو وغراق =واد الجرير من عواليه ساله
باطرافها ساقت مظاهير ونياق =تبدل الأحوال من عقب حاله
عود الهضيده منتهض تقل زملاق =شهد لها نبت الورق بسياله
خل العلف يركب سفيره بالأسواق =عقب الدهور الشهب يرتع حلاله
راحت حدائق كنها وردة الباق =ولبست حللها من ملابس جماله
ساقت كواكبها سعادات وفراق =والمفردات موضحاتن سؤاله
تمت بذكر اللي على الكون خلاق =فردن صمد محصي كثايف رماله
=الشـــــــــاعر / شــــــــــلاح صالح بن فــــــــازع الحــــــربي

الموضوع الأصلي: هب النسيم وذعذع الريح وانساق || الكاتب: شلاح صالح بن فازع || المصدر: منتديات القصيرين من حرب

المصدر: منتديات القصيرين من حرب