يابن وهب تملك ذهب عالي العال=بعت وشريت بكل طـــــيب وغالـي
شاعر علم معروف وبيوتك جزال=روايع مــــثل الـقـــراح الزلالــــي
تراك يابن الــــعـــم دايم على البال =ابشر بـعــزك يالصديق المثالـي
اقــلـــــط على فله ودله وفـــنـجـــال=فنجال اشـــقر مثل دم الغزالــي
نبي نجيب احلى السوالف والامثال=اسمع مقالك وانت تسمع مقالــــي
من جالـــس العالم من الــعـــلم يكتال=ومن جالس الجاهل يزيده ضلالي
ترى الــقـــلـــوب الها مفاتيح واقفال=على كنوزٍ في صدور الرجالي
اللي اليا جت حزة الــعــقـــل عـــقال =ووقت الحديث الكل منهم هلالي
ينسيك همك بالمرح والــــتـــبهلال=ويدخلك جو شـــاعـــريٍ خيالي
وترى الصديق الي صدوق اليا قال=ياقف معك في كل خطب اجلالي
الاصدقاء الوافين في كـل الاحوال=احد بهم مكسب واحد راس مالي
وترى الخساره في مرافقة الانذال=لاحتجتهم نسوا ســـواة الثعالي
من استضل بشجرة مالها اضلال=لاشتد حر الشمس يصلاه صالي
لاباس ياشـــيخٍ بدا فيه ولـــوال =شكا على غــانم وغــانم شكالي
لا تــــبـــيع بيت الملك ياطيب الفال =مدام عمرك باقيٍ لــــــــه توالي
يـامـا بذلتوا به من الجهد والمال =وعشتوا به احلى ايامكم والليالي
من استقر وصار لـه بيت واعيال=ودع حياة الـــــحـــل والارتحالي
الناس تجمعها المصالح والاعمال =لو ان ماحـــد عن مرابيه سالـــــي
يازين شـــوفة نجد الانجد اليا سال=من الرياض اليا حدود الشمالي
وزم النبات وجاك من كـــل الاشكال =ليــــن الغنم تشبع بـروس المفالي
في حاجرٍ يــــشــبه نــصــيه اليا طال=بيض العمايم فوق روس الملالي
مراتــــــع يــــــــدله بهـــا كـــل وبال=يتلون مشهاة البـــكار المتالي
من ذاق حلو الـــدر من كــــل مبهال =يقطع بها فج من الناس خالي
بين اوديه وفياض ورياض وسهال =ماهي صقوع حاشرتها الجبالي
نجد العذيه جوهـــا مالـه امثال =كـلٍ يشيد بــــحسنها والجمالي
اهديتها عــقــد نضمته بسلسال=عقد يليق بــــقــــدرها والـجـلالــي
ونقشت حرف السين والعين والدال =على جنيهٍ صــــــــارفه من حـلالي
وصلوا على الــــمــــخـــتار والصحب واﻵل=وعـلـــى الله الــتــــوفــــيـــق والاتـــكالي
الشاعر سعد بن عبيدالله القصيري