هلا وغلا براع البيوت السمينه=نوادر مثل البكار الحباحيب
ارسلهن اللي جعل تسلم يمينه=قافه وميقافه يسر الاصاحيب
نحيي النشمي ونوفيه دينه=ونرفع له البيضا بروس المراقيب
الخير واجد والذهب بالخزينه=ولنا وعلينا للنشاما مواجيب
حالي ومالي لابن الأبيض رهينه=لو ان مالي من وراها مطاليب
مااظن فيه احقوق بيني وبينه=اليا اجتمعنا ضيوف والا معازيب
من روس حرب اللي تقود السفينه=عمري ومسروحي وذيب ولد ذيب
أولاد الأبيض مجدهم وارثينه=أهل المهار القحص والشمخ النيب
المرجله فنجالها شاربينه=اليا ثنوا من دون حرش العراقيب
واميرهم شيخ يقود الضعينه=من ساس عد وجد ماهم مناصيب
مازال قافٍ كلنا حافضينه=لابن شرار الشيخ عطب المضاريب
واليا رويت اصدق خبر عن جهينه=مالك ومال مروجين الاكاذيب
الشاعر سعد بن عبيدالله القصيري

الموضوع الأصلي: مرد على الشاعر نشمي البيضاني || الكاتب: فهد سعد || المصدر: منتديات القصيرين من حرب

المصدر: منتديات القصيرين من حرب