هذه القصيده بمناسبة زواج احمد خليل الديري القصيري
من المدينه وجه الجيب للشرق=وعد الجبال النايفات المطله
عبه من البنزين ولاتحسب الفرق=وبعد المحطه واجب الفجر صله
جيبٍ تسابق سرعته سرعة البرق=أو نو مزنٍ من سماها تهله
اتعب معه ساهر ودورية الطرق=أزرن يجيبن سرعة الجيب لله
عجل عليه داخلي يحترق حرق=يم الديارا شوقي اليوم كله
تاريخهم في صفحة المجد مشرق=كلٍ يشوفه بالسما واضحٍ له
يوم إنها بالسيف والرمح والزرق=أفعالهم بكبود الاخصام عله
كم طيروا رووسٍ وكم سيلوا عرق=فيهم طناخه والشجاعه جبله
فعلٍ على وضح النقى ماهو بدرق=ولاهي سواليف الهياط الممله
انصى قصورٍ عامره ماتبي طرق=مفتوحة البيبان في راس تله
ايمرها اللي بالشقى غارقٍ غرق=يلقى بها من جور وقته مظله
من طيبهم تسرق قلوب الملا سرق=سرقٍ بشرع الله وربي محله
شيوخٍ لهم بالجود وبمدته طرق=طرقٍ لهم يعجبك دقه وجله
شيوخ الديارا عن شيوخ العرب فرق=فنجالهم يسوى ثمانين دله

=الشاعر / فهد عبدالله معزي الصبيحي

الموضوع الأصلي: من المدينة وجه الجيب للشرق || الكاتب: الساري || المصدر: منتديات القصيرين من حرب

المصدر: منتديات القصيرين من حرب