يامرحبا ترحيبةٍ مالها حدود=تضفي كما تضفي على الارض الامطار
من نو وسميٍ له بروق ورعود=لين اصبحت ما بين جنات وانهار
ترحيبةٍ تبهج لها قلوب وكبود=نبدا بها للضيف مع شبة النار
اليا فاح ريح الهيل مع ريحة العود=وشوفة وجيهٍ زادت النور بنوار
قدمت قافٍ مايجي فيه منقود=مثل الذهب ما بين وزنه وقنطار
بسمي وبسم شيوخنا معدن الجود=اللي لهم عندي معزه ومقدار
ياعيال عمي ياذرى كل مضهود=يا ابنا قصير ياطويلٍ الاشبار
بالله عليكم رشوا الدرب بورود=اليا جونا اهل سمحه من البعد زوار
وبالله عليكم زيدوا الحفل بعقود=اليا منهم وصلوا طويلين الاعمار
الخير دايم باكثر الناس موجود=واصل العنوز كنوز ورموز واخيار
اهل مرابط خيل واذواد واعدود=واكبر قبايل نجد واكثرهم ديار
يااولاد وايل طيبكم غير محدود=منكم مصوت بالعشاء بماض الادوار
ودايم وبيرقكم على العز معقود=وقمتم بحق مزاور الجار للجار
وحي الله اللي رافقوكم من وفود=نور سمانا اليوم بنجوم واقمار
اليوم يومٍ ياابييض الوجه مشهود=شوفتك ياراضي تجدد بالاعمار
شاعر واديب وشيخ ومعرب جدود=شملان والشملان وافين واحرار
يا من اليا عدوا هل العرف معدود= من طيب وقفاتك وهقواتك اكبار
تكسب ولا تقنع وترهي على الزود=واليا انتها مشوار تبدا بمشوار
الشاعر سعد عبيدالله القصيري الحربي