مشاركة بمناسبة زواج الشاب عبدالله بن سالم القصيري المزيني
بدينا واستعنا واتكلنا بالله المعبود=اله الكون علام السراير كاشف النية
له الفضل الكبير وكل فضلٍ له ومنه يعود=رحيماً بالعباد ويبدي الحسنه عن السية
نعمنا من نعم جودك ومن فضلك ونبغي زود=عبادك ما لنا غيرك ليا قمت ارفع ايدية
ولا يالله جنبني دروب النكر والمنقود=ابي قول النشاما لاطروني حي طارية
وابي قافٍ يجملني مع أهل النعم واهل الزود=مذاخير الرجال اللي لهم فالطيب ماريه
سلام الله سلامٍ لاح برقه واقتفاه ارعود=وهلت مزنته واسقت ديار اهل السعودية
سلام الله على حسب الوجوب وسلمنا المعهود=سلام مايشابه له سلام ولا يجي زيه
يا عبدالله دعيت وجيت لك فالموعد المشهود=اجيلك لو ظروف الوقت ماتسمحلي الجية
مدام ان الصداقة بينا ميثاقها معهود=عليه بالحرام اني لجي لو كان رجلية
انا لي معك خوه ما تزحزحها هبوب النود=موثقها على ساسٍ جويد ونارها حيه
على العز وعلى النوماس هذا غاية المقصود=ومثلك نفتخر في خوته سر وعلانيته
لفعل الطيب ولكسب الجمايل ماتبا مردود=مشرف لابتك في كل وقت وكل وجهيه
تطيب وطيبك اللي وارثه من طيب ذاك العود=ابوك اللي كسب طيبه مع اهل الطيب جبرية
وهاذي عادة اهل المعرفة واهل الوفاء والجود=صناديد الرجال اهل المواقيف الحماسية
قبيلة حرب نارٍ موقدة يدفى بها المضهود=وعلى العدوان تحرق مالها رحمه وماويه
محاربة الدول في ساعة فيها العباد شهود= فعول موثقة بين العرب ما هي بمخفية
عثوا بالترك يوم اجنودهم جونا يبون الفود=ما شافوا غير سلات السيوف وحد شبرية
يصنف خصمهم عند الملاقى حسبة المفقود=ميادين المعارك عندهم حاجه طبيعية
لهم في صفحة التاريخ مجدٍ ثابتٍ ماجود=بنوه اجدادهم يوم الخطر بانت مواريه
وساروا من بعدهم في خطاهم واهتنوا في زود=وزادوا فوق مجد اجدادهم مجد انبنا زيه
وهايب من كريم اليا عطاء مال العطاه حدود=عطاهم فوق سطوتهم مع اهل الجاه جاهية
ونعم فالقبايل كلها ما فيهم المنقود=قبايل مملكتنا كلها نارٍ سناوية
الشاعر/ عبدالعزيز بن زاحم السلمي