منتديات القصيرين من حرب

منتديات القصيرين من حرب (http://www.alqesuirien.com/vb/index.php)
-   منتدى الشعر الشعبي (http://www.alqesuirien.com/vb/forumdisplay.php?f=17)
-   -   عزوة قصير والأسم رمز وشعار (http://www.alqesuirien.com/vb/showthread.php?t=6193)

محمد سنيد 12-07-2018 03:32 AM

عزوة قصير والأسم رمز وشعار
 
قصيدة في حفل أبناء الشيخ هايس بن ذاعر بن شطينه
بمناسبة زواج اخيهم الاستاذ أحمد
الهاجس اللي يدفعه قو الإصرار=ويسانده بعد النظر والعزيمه
يصوغ من جزل المعاني ويختار =الشرد اللي ماعليهن وسيمه
حتى القصيدة تكتمل وزن وافكار=ويجي لها عند أهل العرف قيمه
نكسب بها رضا معزب وخطار=ومن الغنايم نعتبرها غنيمه
يأحمد ترى ماعنك صده ومعذار=العذر في بعض المواقف جريمه
ناقف معك ونزف باقات الأزهار=بالفرحه اللي جعل ماهي يتيمه
يامرحبا وعداد ماهل مدرار=هملول وسمٍ من مقاديم غيمه
وماحل من فوق البسيطه ومسار=على ظهرها واسرج اشداد ريمه
في كل من شارك ومن شرف الدار=واجاب للدعوه بقدر وحشيمه
في محفلن حياكم الله له شعار=ربعن وفاهم من عصورٍ قديمه
نطاحة الواجب ليا صار ماصار=الفعل طيب والأيادي كريمه
عيال هايس ياالله إن هايس مجار=وعن العذاب مخلدٍ في نعيمه
شيخٍ رحل له بينا ذكر وآثار=بقيت فعوله بعد فقده مقيمه
ابن شطينة كان ميل الدهر جار=ملجا لمضيومن شكى جور ضيمه
بيته مشرع باب للضيف والمار=ولا فيه يوم الا ببيته وليمه
راع القراين مايحسب لمخسار=بهاك السنين القاسيات الوخيمه
عينن على ربعه وعينن على الدار=حتى تحقق ماسعى بتعميمه
ومن سابق الدنيا ومن عهد حضار=وحنا لنا بصدور الأمجاد قيمه
دايم واحدنا على ماقفه حار=عند اللوازم مانعرف الهزيمه
عزوة قصير والأسم رمز وشعار =لأهل العقول الراجحات الحكيمه
اسمٍ معانق للكرم سر واجهار=مقرون به مثل اقتران التميمه
فرض على التاريخ يخضع له اقرار=ويخلده فوق السطور بصميمه
ترفع به الرايه ويخشاه الأشرار=ويقر فيه أهل العقول السليمه
مزنان من روس أهل الطيب والكار=حرب الحرايب والفعايل مقيمه
اللي مفاخرهم جليات وكبار=أهل الثلاث النادرات العظيمه
المعجزات اللي لهن صيت واذكار=الثالثة لنا عليها الوسيمه
ومدحي لربعي ماينقص بالأخيار=كلن وله حقه وفعله نديمه
=محمد بن سنيد القصيري

المسافر 13-07-2018 06:09 PM

صح لسانك وبيض الله وجهك يامحمد قصيدة جزله

الساري 13-07-2018 08:30 PM

صح لسانك والله يعطيك العافيه لك بصمه وحضور مميز دائم ماشاء الله


الساعة الآن 02:24 PM.

Powered by vBulletin® Version 3.8.7
Copyright ©2000 - 2021, vBulletin Solutions, Inc.
Search Engine Friendly URLs by vBSEO 3.6.0 PL2 Trans by
HêĽм √ 3.1 BY: ! ωαнαм ! © 2010

Security team